الرئيسية » التمديدات الكهربائية والتوزيع الكهربى » تصميم القاطع الرئيسى المغذى من Secondary المحول
CESCO ACADEMY  اكاديمية سيسكو

تصميم القاطع الرئيسى المغذى من Secondary المحول

من المقالات المفيدة

بعض الزملاء طلبوا منى ازاى بنعمل تصميم للقاطع الرئيسى المغذى من secondary المحول والاجابة كالتالى:
ملحوظة: احنا هنشرح بس النهاردة الحماية ضد زيادة التيار
خلونا نراجع شوية اساسيات قلناها قبل كده وهى اننا عشان نصمم او نحسب اى بريكر فلازم نحسب قيمة تيار ‏In ‎‏ او قيمة تيار ‏Ir‏ بحيث يتحقق الشرط التالى:‏
‎ Ib ≤ Ir ≤ In ≤ Iz‎
ومن الشرط ده هنعرف اننا لازم نحقق حاجتين:‏
اول حاجة : ان تيار الحمل الفعلى ‏Ib‏ يجب ان لا يتجاوز قيمة التيار الاسمى ‏In‏ او قيمة التيار المقنن ‏Ir‏ للبريكر
خلى بالك الفرق بين التيار الاسمى ‏In‏ والتيار المقنن ‏Ir‏ للبريكر كما يلى:‏
التيار الاسمى ‏In‏ للبريكر هى اقصى قيمة تيار يمكن ان يتحملها البريكر فى الظروف الطبيعية للتشغيل وله حالات ‏مختلفة كما يلى:‏
‏1- بيعبر عن ‏Frame size Rating AF‏ اذا كانت ال ‏Trip unit up to maximum current of frame size‏ ‏زى فى حالة ال ‏‎ Fixed thermal Magnetic breakerامثلة على ذلك:
زى ما نقول ان البريكر ده 100 امبير (fixed) ففى الحالة دى بيكون التيار الاسمى ‏In‏ للبريكر = 100 امبير ‏‎=‎‏ التيار ‏المقنن ‏Ir‏ ‏
او مثلا لما نلاقى لما نلاقى بريكر مكتوب عليه ‏‎1000AT/1000AF‎‏ ده معناه ان التيار الاسمى ‏In‏ للبريكر = 1000 امبير ‏‎=‎‏ التيار ‏المقنن ‏Ir‏ ‏
‏2- اوبيعبرعن قيمة ال ‏Max setting of Trip unit ‎‏ اذا كانت ال ‏Trip unit not up to maximum current ‎of frame size‏ ويبقى فى الحالة دى بيعبر عن ال ‏Ampere Size Rating AT امثلة على ذلك:
نلاقى بريكر ‏‎800AT/1000AF‎‏ و معموله ‏setting‏ على 100% (Max setting of Trip unit) ده معناه ان التيار الاسمى ‏In‏ للبريكر = ‏‏800 امبير = التيار المقنن ‏Ir‏ … لكن ال 1000 امبير بتسمى ال frame size وهى بتفرق فى المثال ده حوالى 200 امبير عن ال In وبتعتبر كانها نسبة تيار احتياطية يمكن استخدامها لاضافىة اى احمال مستقبلية بتغيير ال trip unit نفسها حتى تساوى قيمة ال frame size وتصبح 1000AT/1000AF
ومثال أخر لو عندنا بريكر ‏‎800AT/1000AF‎‏ و معموله ‏setting‏ على 50% ففى الحالة دى التيار الاسمى ‏In‏ للبريكر = ‏‏800 امبير و التيار المقنن ‏Ir‏ = 400 امبير
فى حين ان التيار المقنن ‏Ir‏ للبريكر هو قيمة التيار التى يتم ظبط ال ‏Trip unit‏ للفصل عندها وهى نسبة تترواح من :
-70 الى 100% من التيار الاسمى ‏In‏ للبريكر فى حالة ال ‏Adjustable TMA trip unit‏
– وفى حالة البريكر المزود ‏ب ‏Electronic trip unit‏ بتترواح من 40 الى 100% من التيار الاسمى ‏In‏ للبريكر يعنى دائما:‏
Ir ≤ In‎
ملحوظة: التيار المقنن ‏Ir‏ للبريكر فى حالة ال ‏‎ Fixed thermal Magnetic breaker‏ بنلاقيه يساوى تيار ال ‏In زى ما شرحنا فوق
تانى حاجة: ان لا يتجاوز قيمة التيار الاسمى ‏In‏ للبريكر قيمة السعة الامبيرية للكابل Iz وهى اقصى قيمة تيار يمكن ان ‏يتحمله الكابل.‏ يعنى ما ينفعش تجيب بريكر 63 امبير عشان يحمى كابل سعته الامبرية 50 امبير.‏
طيب ليه ما قلناش ان لا يتجاوز قيمة التيار المقنن ‏Ir‏ للبريكر قيمة السعة الامبيرية للكابل عشان مثلا فى حالة ‏البريكر ‏‎800AT/1000AF‎‏ و معموله ‏setting‏ على 50% ما يجيش واحد يلعب فى ال ‏Adjustable Trip ‎Relay‏ ويعلى قيمة التيار ويوصلها الى 800 امبير (100%) فى حين انك مختار الكابل على 400 امبير بس.‏
———————————————–
طيب نرجع بقا لموضوعنا انت دلوقتى عايز تصمم القاطع الرئيسى المغذى من secondary المحول
خلى بالك ان اى قاطع رئيسى مغذى من مصدر تغذية مباشرة يفضل ان يكون من النوع ال Adjustable سواء TMA او Electronic
اولا: طبقا لكود ال IEC
احنا دلوقتى عايزين نحسب شوية حاجات للقاطع ده وهى ال Ir وال In وال frame size.. ازاى؟
القاعدة بسيطة خالص كما يلى:
الخطوة الاولى: هنحسب تيار ال Ib طبقا للحمل الموجود
الخطوة الثانية: هنحسب ال Ir (قيمة التيار التى يتم ظبط ال ‏Trip unit‏ للفصل عندها) بقيمة صحيحة اعلى من قيمة ال Ib مباشرة
الخطوة الثالثة: هنحسب ال In طبقا لتيار المحول قبل تطبيق ال Projected Future Load Factor يساوى 25% وبناخد القيمة القياسية الاعلى مباشرة وهتكون دى قيمة ال Max setting of Trip unit
الخطوة الرابعة: هنحسب قيمة ال frame size طبقا لتيار المحول وبناخد القيمة القياسية الاعلى مباشرة
————————————–
مثال: عندنا محول 1 ميجا 11 / 0.415 كيلو فولت بيغذى حمل مقداره 650 كيلو فولت امبير .. صمم القاطع الرئيسى المغذى من secondary المحول؟
الخطوة الاولى : هنحسب تيار ال Ib طبقا للحمل الموجود = = 650/(0.415 * 1.73) = 905.35 امبير
الخطوة الثانية: هنحسب ال Ir (قيمة التيار التى يتم ظبط ال ‏Trip unit‏ للفصل عندها) = 910 امبير .. يعنى هنظبط ال trip unit على 910 امبير
الخطوة الثالثة: هنحسب ال In طبقا لتيار المحول قبل تطبيق ال Projected Future Load Factor يساوى 25% = 1000/ (0.415 * 1.73 * 1.25) = 1114.28 امبير
هنختار قاطع بتيار In من الاستاندرد بيساوى 1250 امبير وهتكون دى قيمة ال Max setting of Trip unit
الخطوة الرابعة: هنحسب قيمة ال frame size طبقا لتيار المحول = 1000/ (0.415 * 1.73) = 1392.85 امبير
وبناخد ال frame size القيمة القياسية الاعلى مباشرة = 1600 امبير
وعلى هذا هيكون القاطع المختار هو 1250AT/1600AF ويظبط ال Trip setting على قيمة Ir = 910 امبير
و مرفق صورة توضح ترتيب القيم المحسوبة
ملحوظة مهمة: اذا كانت حسابات المحول لا تحتوى على Projected Future Load Factor ففى هذه الحالة بيكون ال In طبقا لتيار المحول = قيمة ال frame size = 1600 امبير
وهيكون القاطع المستخدم 1600AT/1600AF ويظبط ال Trip setting على قيمة Ir = 910 امبير
————————————
ثانيا: طبقا لكود ال NEC
الخطوة الاولى: احسب قيمة تيار ال In = Ir طبقا لتيار المحول مضروبا فى 1.25 = 1.25 * 1000 / (0.415 * 1.73) = 1741 امبير
الخطوة الثانية: اختار القيمة القياسية الاعلى مباشرة = 2000 امبير
ومرفق جدول رقم 450.3(A) والذى يوضح اقصى قيمة للحماية ضد زيادة التيار للمحولات ذات الجهد اعلى من 1000 فولت كنسبة من التيار المقنن للمحول
واحنا فى اغلب التصميمات بنشتغل على اخر عمود واول صفين فقط. يعنى على نسبة 125%
——————————
اللهم علمنا ما ينفعنا و انفعنا بما علمتنا و زدنا علما
Facebook Comments Box

اضف رد

لن يتم نشر البريد الإلكتروني . الحقول المطلوبة مشار لها بـ *

*

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.