ايه الحاجات اللى تاخد بالك منها لو بتنفذ أو بتستلم مواسير وبوكسات؟؟؟
ايه الحاجات اللى تاخد بالك منها لو بتنفذ أو بتستلم مواسير وبوكسات؟؟؟ …
………………………………………………………………………..
1. Approved Material Used
لازم تتأكد من إن الخامات المستخدمة مطابقة لما تم إعتماده ….طب لو انت اعتمدت مواسير معينة وجيت قبل التركيب لقيت انها مش متوفرة فى السوق …عادى جدا هتعتمد بديل ..وممكن الاستشارى يطلب منك انك تقدم له خطابات أو ايميلات من أكتر من مورد إن المواسير اللى انت اعتمدتها مش متوفرة حاليا
……………………………………………………………………………….
2. Check Conduit size and type
طبعا لازم تشيك أثناء تركيب المواسير أو لو انت استشارى وبتستلم الشغل ان احجام المواسير المستخدمة مطابقة للرسومات ….كمان نوع المواسير المستخدم لازم يكون مطابق للمواصفات ….لان زى ما احنا عارفين فيه انواع كتيرة للمواسير وكل نوع ليه أكتر من براند ….وكل نوع ليه استخدامه ….هنا لازم تكون مذاكر الرسومات والمواصفات …..عشان تعرف ايه نوع ومقاس الماسورة اللى هاستخدمها …..على سبيل المثال ممكن تلاقى مكتوب فى مواصفات المشروع ….
-installations in or under concrete slab , or underground : PVC
– exposed outdoor locations : rigid steel conduit
– exposed dry interior locations : intermediate metal conduit (IMC) or electrical metallic tubing ( EMT)
وهكذا …..طبعا فى البوست اللى فات قلنا انك تذاكر المواصفات والرسومات كويس قبل ما تبدأ شغل …واثناء الشغل لازم تتأكد إنك ماشى طبقا للرسومات والمواصفات
……………………………………………………………………………
3. All conduits installed as per approved drawing
طبعا وانت شغال خد بالك إن الرسومات المعتمدة مش قرءان …يعنى انا عندى مثلا فى رسمة انارة عبارة عن مسارات ومخارج ….مهم ان المخارج تكون فى مكانها زى الرسم المعتمد ….ولوحبيت تغير فى اماكن المخارج لأى سبب انا قلتلك مفروض تعمل ايه فى البوست اللى فات …..لكن المسارات إلعب فيها براحتك بما يتناسب مع ظروف الموقع …لكن لو غيرت فى المسارات المفروض تسجل التغييرات دى وتحاول تكون دقيق فى أماكن بوكسات الترييح لانك بتحتاجها كتير فى مرحلة الصيانة ….بتسجل التغييرات وترفقها مع طلب الفحص اللى بتقدمه للإستشارى….. ..وكمان تسجيل التغييرات هيسهل عليك جدا وانت بتعمل الأسبلت…..وفى بعض المشاريع بيسموا الرسومات اللى بتسجل عليها التغييرات دى red mark or recorded drawing
………………………………………………………………………
4. Check pull boxes are provided as per requirement
مهم جدا وإنت شغال فى تركيب المواسير إنك تراعى بوكسات السحب أو بوكسات الترييح عشان ترتاح فى سحب السلك بعد كده …..ممكن تحط بوكس ترييح كل 10 متر لو الماسورة ماشية عدل مافيهاش انحناءات بحيث ان المسافة بين اى بوكسين لا تتعدى 10 متر ….بعد الكوع او انحناء بزاوية قائمة برضه تحط بوكس ترييح …بعد كل انحنائين 45 درجة ( يعنى مجموع زواياهم 90 درجة ) …بعد كرنكين وزاوية 45 برضه ….وهكذا …والمفروض بيكون مكتوب فى المواصفات بتاعة المشروع بتحط بوكس ترييح كل مسافة كام متر أو بعد كام انحناء فى الماسورة ….مثلا ممكن تلاقى مكتوب فى المواصفات
– install no more than the equivalent of three, 90-degree bends between boxes
………………………………………………………………………….
5. Check installed conduits are free from any damages
قبل ما تسلم شغلك لازم تتأكد إنه سليم تماما وان مافيش حاجة مكسورة …..ممكن مثلا فنى يكون بيفصل ماسورة ( واتعصرت ) منه ….أو مقاول تانى فى نفس المشروع كسر لك شغلك ……كذلك بعد ماتسلم شغلك لازم تتابعه عشان لو حصل حاجة تلحقها فى الوقت المناسب ….يعنى مثلا انت ركبت وسلمت مواسير بى فى سي فى حيطة جيبسوم بورد ……لازم تتابع مقاول الجبس وهو بيقفل الحيطة عشان لو كسر لك شغلك تلحق تتصرف خصوصا لو لسه ماسحبتش السلك
………………………………………………………………………………..
6. Check the conduits are properly fastened to withstand the force while concrete is poured
تثبيت المواسير مهم بصفة عامة ……وبصفة خاصة لو بتركب مواسير فى السلابة لانها لو مش متثبة بشكل صحيح ممكن مع صب الخرسانة كل شغلك يروح على الفاضى … وهتبقى المشكلة أكبر لو مافيش سقف ساقط فى نفس المكان ومش مسموح لك تركب مواسير خارجية ظاهرة تحت السقف ….كذلك ماينفعش تثبت المواسير فى وسائل تثبيت أو تعليق الأنظمة الأخرى يعنى ماينفعش يبقى دكت التكييف متعلق على حوامل دكت وتيجى سيادتك تثبت مواسيرك فى حوامل الدكت دى ( لإنه ممكن يفك أو يعدل شغله لأى سبب ) ….. لازم كل المواسير تتثبت بوسائل تثبيت ( دائمة غير مؤقتة ) زى الأفيز saddle/strap مثلا أو سلك الرباط لو شغال فى السلابات …. ممكن تركب أفيز قبل كل بوكس وبعده …قبل أى إنحناء وبعده …. قبل أى جلبة وبعدها ….أو لو ماسورة طويلة تركب أفيز كل 120 سم…وهكذا …. وبرضه المفروض تلاقى طريقة تثبيت المواسير المطلوبة لمشروعك فى مواصفات المشروع …ممكن مثلا تلاقى فى المواصفات مكتوب
– two hole strap shall be provided before and after 25 cm of any box , bend or coupler.
– do not fasten conduit with wire or perforated pipe scraps. remove all wire used for temporary conduit support during construction, before conductors are pulled.
………………………………………………………………………….
7. Check the end of conduits connection ( sharp ends must be avoided )
نهايات المواسير الحادة بتعمل مشكلة كبيرة أثناء سحب الأسلاك ( ممكن تجرح عزل الأسلاك ) ودى بتظهر فى أغلب الأحيان مع المواسير الصلب بأنواعها ….لذلك بعد مابتقطع الماسورة ال إى إم تى مثلا بتستخدم المبرد لإزلة اى نتوءات وتنعيم مكان القطع وبرضه المفروض بتركب أدبتور إى إم تى لربط الماسورة بالبوكس وفى سن الأدبتور بتركب بى فى سي أو إى إم تى بوشنج bushing لحماية الأسلاك أثناء سحبها ……وكل نوع مواسير ليه طريقة فى التعامل للتغلب على نهايات المواسير الحادة …..وبرضة النقطة دى ممكن يكون مشار إليها فى المواصفات …ممكن تلاقى مثلا مكتوب لك فى المواصفات
-cut conduit square using a saw or pipecutter ; de-burr cut ends.
…………………………………………………………………………
8. flexible conduit shall be provided for expansion joint
بعض المبانى بيكون فيها فواصل تمدد …. وهنا بتركب بوكس قبل فاصل التمدد ب 10 سم وبوكس بعد الفاصل ب 10 سم وبينهم وصلة مرنة وأثناء سحب السلك بتسيب طول فى البوكس وبتربط بينهم بسلك تأريض …..أو بتتعامل مع فواصل التمدد كما هو منصوص عليه فى مواصفات المشروع ….ممكن يذكر لك فى مواصفات المشروع
– install expansion-deflection joints where conduit crosses building expansion or seismic joints.
-conduits crossing building expansion joints shall have expansion provisions with grounding continuity ; use special expansion fittings or other BS 7671 approved method.
. ………..
فى الكود المصرى
يكون مرور التوصيلات عبر فواصل التمدد خارج الحوائط بقدر الإمكان، وإذا
تحتم مرور التوصيلات داخل الحوائط يجب تركيب صـندوق إتصـال علـى
جانبى الفاصل، ويركب بين هذين الصندوقين جراب من ماسورة من الصـاج
قطرها ضعف قطر ماسورة التمديدات الكهربائية التى تركب داخلها، وتكـون
المواسير التى تعبر الفاصل معدنية مرنة، ويترك بالكابلات (أو الأسلاك) طول
إضافى مناسب داخل صناديق الإتصال، وفى حالة استخدام مواسير من الصلب
يجب عمل كبارى نحاسية بين صندوقى الإتصال على جانبى الفاصـل لجعـل
المواسير متصلة كهربائياً
…………………………………………………………………………………
9. install conduits in accordance with manufacturer’s instructions.
لو مُصنٍع أو مورد المواسير أو أى خامات بتشتغل بيها ليه توصيات معينة أثناء التركيب حاول تلتزم بيها …..كذلك الرسومات التنفيذية بيكون فيها تفاصيل التركيب … كذلك أى ملاحظات مكتوبة فى الرسومات التنفيذية حاول تذاكرها كويس وتراعيها أثناء التنفيذ
………………………………………………………………………………
10. clearance between electrical conduits and other trades.
تانى باقولك أن التنسيق مهم جدا وإنك كمهندس كهربا مش شغال لوحدك …. فى بعض مواصفات المشاريع بيشترط وجود مسافات معينة بين مواسير الكهربا والحاجات التانية ..على سبيل المثال ….فى الكود المصرى.. يجب ترك المسافات التالية للفصل بين مواسير التمديدات الكهربائية ومواسـير
الخدمات الأخرى:
– ٣٠٠ مم لتمديدات المواسير الموازية لمواسير البخار والماء الساخن.
– ١٥٠ مم لتمديدات المواسير المتقاطعة مع مواسير البخار والماء الساخن.
– ٧٥ مم لتمديدات المواسير الموازية أو المتقاطعة مع مواسير الماء البارد.
– يجب ألا تقل المسافة بين شبكة مواسير التمديدات الكهربائية وشبكة إنـذار
الحريق عن ٥٠٠ مم فى حالة توازى مسار الشـبكتين، أمـا فـى حالـة
تعامدهما فيجب أن توضع ماسورة التمديـدات الكهربائيـة علـى حوامـل
بارتفاع ٥٠ مم على الأقل لفصلها عن شبكة الإنذار.
……………………………………………………………………
11. conduit color identification
لو انت فى مشروع كبير ….وعندك أكتر من سيستم ….. فهتركب مواسير كتير فى الخرسانة وبعد صب الخرسانة وفك الخشب مش هتكون شايف غير البوكسات والنزلات وهيكون صعب عليك تميز هل البوكس ده تبع الباور ولا الانارة ولا الداتا ولا الفاير ألارم وهكذا …. فممكن ترش بوكسات ونزلات كل سيستم بلون معين عشان اول ما تشوف البوكس أو النزلة تعرف بمجرد النظر هى تبع اى سيستم …..ممكن الانارة باللون الأصفر ….الباور بالأسود …. الداتا بالأزرق …..الفاير بالأحمر …….المهم تثبت الألوان فى المشروع عشان ماتتلخبطش ……..برضه وانت بتركب مواسير فى السلابة ماتحطش مواسير كتير لازقة فى بعضها ….سيب مكان ماسورة بين كل ماسورة وماسورة عشان ما تأثرش على الخرسانة
…………………………………………………………………………..
12. spare conduits shall be provided
ماتستخرش ترمى كام مسورة سبير للإستخدام المستقبلى أو لإحتمالية أى إضافات أو تعديلات …… يعنى مثلا عندك 10 مواسير بتوع 10 كابلات معديين من طريق رئيسي …….حط 15ماسورة مثلا بدل 10 وإن كان ده هيكلفك شوية لكن لو حطيت 10 بس وحبيت تضيف ماسورة واحدة تكلفة ووقت الحفر من جديد هيكون أكبر بكتير من الكام ماسورة اللى هتحطهم سبير
…………………………………………………………………………..
13- pull line shall be installed
لو ركبت مواسير ( خصوصا لو مدفونة ) ومش هتسحب الأسلاك علطول يفضل تحط فيها شداد ….. عشان تتأكد إن المسار سالك وسليم ….والشداد ده عبارة عن خيط بلاستيك مثلا بيتسحب مكان السلك مؤقتا فى الماسورة ….لإن لو مافيش أسلاك فى المواسير ولا شدادت وحابب تسلمها …. الاستشارى هيعرف منين إن المسارات بتاعتك سليمة؟؟ …..والنقطة دى أحيانا بتكون إجبارية ومنصوص عليها فى مواصفات المشروع مش بس كده …دا ممكن يطلب منك تعمل ليبول على الشدادات دى عشان تميز كل سيستم عن التانى وكل دايرة عن التانية…ممكن يقولك مثلا
– install 1 yellow pull line in all conduits which have no conductors provided . tag pull lines for future item served.
…………………………………………………………………………..
14- conduit caps shall be provided
ماتسيبش نهايات المواسير أو البوكسات مفتوحة …….ممكن تقفلها بفوم وتيب أو أى وسيلة معتمدة فى مشروعك …عشان مافيش حاجة تسد المسارات بتاعة الأسلاك وتغلبك فى السحب بعد كده ……ممكن يقول لك فى المواصفات
– use suitable conduit caps to protect installed conduits against entrance of entrance of dirt and moisture.
………………………………………………………………..
15- check conduit penetrations
ودى نقطة مهمة جدا ….وممكن تلاقى فى المواصفات جزء كامل بيتكلم عنها ….ايه المطلوب لو ماسورة هتخترق حائط فاصل بين منطقتين أو هتخترق من أرضية دور لدور تانى؟؟ …… لازم ترجع لمواصفات المشروع ……ممكن يطلب منك فى حالة إختراق ماسورة خلال حائط مقاوم للحريق إنك تحط مادة مقاومة للحريق ( لعدد ساعات مساوى لعدد ساعات مقاومة الحائط ) حوالين الماسورة ….فى أماكن تانية ممكن يطلب منك ان الماسورة تعدى فى سليف/جراب ….وهكذا فلازم تراجع المواصفات كويس …ممكن يكتب لك
– penetrating fire rated walls: provide fire-stop assembly with fire rating equal to wall rating
-penetrating suspended ceiling : cut hole as small as possible to permit conduit penetration
-penetrating sound insulated wall : install conduit in sleeve and seal penetration
وهكذ ….بتشوف ايه المطلوب فى كل حالة على حسب مواصفات مشروعك وتمشى عليه
……………………………………………………………………
16- check all back boxes location / height
العلب أو البوكسات مهم جدا انك تركبها فى مكانها زى الرسم وعلى نفس الإرتفاع المذكور فى الرسم ……ولو فيه معلومات ناقصة على الرسم لازم تسأل وتعرفها قبل ما تركب ….كمان أحيانا بعض الحاجات بيكون ليها البوكسات الخاصة بيها …. يعنى ممكن البوكس اللى يركب عليه المفتاح مايركبش عليه ثرموستات التكييف ….. ممكن البوكس اللى بيركب عليه البريزة العادية مايركبش عليه بريزة الحلاقة/الشيفرسوكت shaver ….وبرضه ماينفعش تركب بوكسين فى نفس المكان على جهتين متقابلتين من نفس الحائط يعنى بوكس ضهره فى ضهر بوكس تانى (عشان انتقال الصوت )…….المفروض بتسيب 15 سم مسافة أفقية بينهم ……وغالبا دى بتكون مذكورة فى المواصفات وأحيانا ما بتقدرش تلتزم بيها …. لكن على كل حال لو بتسلم استشارى وانت عامل بوكس فى ضهر بوكس على نفس الحائط والاستشارى قال لك كده مش صح ابقى قول له ( قول لى انت اركبها فين وانا اركبها ) … فى المواصفات مثلا ممكن تلاقى
– do not install wall-mounted boxes back to back in opposite sides of wall ; in stud walls , boxes shall be on opposite side of studs with minimum of 150mm of separation
……………………………………………………………………………………………………………………………………………………………………
ملحوظة أخيرة
ال first fix … هو أول حاجة باعملها ….يعنى المواسير first fix …. وال second fix تانى حاجة يعنى سحب السلك second fix……… تركيب التريهات والترنكات fist fix …..سحب الكابلات second fix وهكذا.
