سؤال اتكرر كتير ….
كمهندس موقع ايه المطلوب منى ؟؟

شفت رد من أحد الزملاء على سؤال زى ده وكان رده إن مهندس الموقع عبارة عن ( مقاول أنفار ) .. عشان كده حبيت أوضح شوية حاجات ممكن يقوم بيها مهندس الموقع … وأسأل الله أن يجعله علما ينتفع به خالصا لوجهه
……………………………………………

كمهندس موقع فى شركة مقاولات لازم تاخد بالك من شوية حاجات
١- عشان تبدأ تنفيذ أى سيستم انت محتاج رسومات تنفيذية و محتاج الخامات اللى هتركبها
فأول حاجة لازم تتأكد إن الرسومات معتمدة وكذلك الخامات من استشارى المشروع
ولازم تراجع الإعتماد لمراعاة ملاحظات الإستشارى ( إن وجدت )

٢- كده يا بطل إنت جاهز تنفذ ؟؟…طبعا لأ ..لإنك لسه ماطلبتش الخامات ….وقبل ماتطلبها لازم تذاكر الرسومات كويس وتشوف ازاى تقدر تقدم حلول توفر فى الوقت والتكلفة أو ترفع من جودة الشغل… يعنى مثلا لقيت الرسم بيقول إن فيه 15 ماسورة ماشيين بطول طرقة ولقيت إنه أفضل لك تمشي بترنك عشان توفر فى الوقت والتكلفة … وهنا لازم تكون مذاكر مواصفات المشروع ( specs ) عشان ما ينفعش تقترح حاجة غير متماشية مع مواصفات المشروع..والعملية دى إسمها value engineering يعنى بتشوف حاجة تؤدى نفس الوظيفة بتكلفة أقل ووقت أقل ..وكمان تشوف العقد عشان تعرف نطاق أعمالك بالظبط ( ممكن شركتك يكون عليها مثلا تنفيذ مخارج الباور – كعلبة وماسورة وسلك – لكن البريزة نفسها مش عليها ف ماينفعش تطلب حاجة مش فى نطاق عملك ( scope of work ) ….

٣- خلصت دراستك للرسومات واعتمدت اقتراحاتك من الإستشارى وطلبت خاماتك والخامات وصلت الموقع ….لازم تراجع على كل الخامات وهل هى فعلا اللى طلبتها ولا لأ وتعمل MRR يعنى ( material receiving report ) ….بعد كده بتقدم للإستشارى طلب فحص الخامات ( قبل ماتبدأ تشتغل بيها ) ..بتقدم للإستشارى MIR يعنى ( material inspection request ) …وتعتمد الخامات من الإستشارى رسميا قبل إستخدامها

٤- هتبدأ تركيبات فى الموقع .. لازم تعرف إنك مش شغال لوحدك … لو انت مهندس كهربا هيكون فيه غيرك ميكانيكا وتيار خفيف و مدنى ومعمارى وغيرهم … لازم تنسق شغلك معاهم وتراجع رسومات ال coordination drawings ….ودى رسمة شاملة المفروض بيكون عليها كل الأنظمة ( وغالبا مش بتتطبق فى الموقع والأطراف المختلفة فى المشروع بينسقوا مابينهم بما يتناسب مع ظروف الموقع ) …طب ليه هتراجع الرسومات دى؟ …شوف رقم ٥

٥- ليه بتراجع رسومات الأنظمة اللى مش معاك ..السبب الرئيسي ( من وجهة نظرى ) لتفادى إعادة أو تعديل ما تم تنفيذه اللى هو اسمه rework يعنى وقت وتكلفة كان ممكن تتفاداهم لو فكرت شوية وركزت شويتين ….وانت بتراجع رسومات التكييف مثلا ممكن تلاقى أن area معينة من المشروع فيها ١٠ وحدات تكييف FCUs لكن عندك فى رسومات الكهربا فيه ٩ بس
طب هتعمل ايه ؟؟؟ مش هقولك …
مثلا ممكن تلاقى مفاتيح إنارة وبرايز جنب السرير على ارتفاع ٤٥ سم مثلا على رسومات الكهربا وانت بتبص على رسومات الفرش لقيت أن فيه كومود ( دلع كوميدينو) ارتفاعه ٦٠ سم ودا معناه أن مخارج الكهربا ورا الكومود .. طب هتعمل ايه؟ برضه مش هقولك …… حتى وانت بتراجع رسومات الكهربا نفسها ممكن تلاقى على الرسم كاتبلك انك هتستخدم سلك ٦ مم فى دايرة معينة وفى جدول الأحمال نفس الدايرة مكتوب انها ٤ مم
طب هتعمل ايه
أقولك
كل الحالات اللى تلاقى فيها اختلاف بين الرسومات وبعضها بتبعت للإستشارى RFI يعنى.. request for information …
هتعرض الإختلاف وترفق الرسومات اللى تثبت كلامك ولو عندك اقتراح تقدمه وتقول له please advise ..واللى يعتمده الإستشارى هنمشى عليه
( دى حتة تنسيق واحنا فى التكييف فى المكاتب ) لكن التنسيق الأهم بيكون فى الموقع …حتى شوف رقم ٦

٦- التنسيق فى الموقع مهم جدا …يعنى لازم تكون صاحى وعينك وسط راسك وخصوصا لو انت اللى بتشتغل الأول ..يعنى مثلا ممكن يكون عندك برج ٣٠ دور … والشركة مستعجلة على الإنتهاء من أعمال ال wet area ..الحمامات …. وانت دخلت تخلص شغلك وعملت ماسورة أفقية فى حائط فى الحمام وخلصت البرج كله …دخل مهندس ال plumbing يشتغل لقى الماسورة بتاعتك جاية فى نفس مكان ال flushing tank … طبعا إجبارى إنت اللى هتعدل وهتبقى لبست لبسة صح لان صعب تغيير مكان ال flushing tank ….وكذلك لو نازل رأسي بمواسير من السقف على مفاتيح مثلا ودخل وراك مهندس ال HVAC وقالك إنه عنده duct ماشي فى نفس المكان اللى فيه مواسيرك برضه غالبا انت اللى هتلبس وتعدل ..والأمثلة دى حصلت بالفعل

٧- بدأت تنفيذ وخلصت جزء من من الشغل …لازم تسلم للإستشارى …بتقدم للإستشارى WIR …. ( Work inspection request ) …. ولو فيه ملاحظات للإستشارى خد بالك منها كويس عشان ما تكررهاش تانى

٨- لو عندك مثلا ١٠٠ لوحة كهربا فى المشروع ….مش صح انك تخلص كمية كبيرة وتسلمها ..لإنك لو خلصت ٢٠ مثلا والاستشاري طلع لك ملاحظة واحدة كده بقى عندك ٢٠ ملاحظة …طب الصح إيه ؟؟ …..
الصح إن أى حاجة عندك منها عدد كبير إنك تعمل عينة واحدة ( mock-up ) .. وتسلمها للإستشارى وتشوف ملاحظاته عشان باقى الشغل يطلع كويس

٩- لازم يكون عندك نظرة لقدام … ماتبصش تحت رجلك … من أول يوم فى المشروع بص على آخر حاجة هتتعمل فى المشروع …يعنى إيه ؟؟
يعنى مثلا لو إنت شغال فى سيستم إنارة وشغال فى المواسير والسلك ..( ولو مشروع كبير. ممكن تفضل ٤ سنين مثلا شغال ماسورة وسلك ) … فلازم تشوف نوع الكشاف اللى هيركب ومواصفاته وأبعاده …طب هاستفاد إيه من كده ؟؟؟
لما تذاكر الداتا شيت بتاعة الكشاف ممكن مثلا تلاقى إن الكشاف فى جزء منه ٢٠ سم مثلا هتكون غاطسة فوق السقف وفى نفس الوقت ممكن متلاقيش. مسافة كافية انك تركب الكشاف …لإن فوق السقف خاصة فى المشاريع الكبيرة بتلاقى عالم تانى ( تريهات _ ترنكات – مواسير سباكة – مواسير إطفاء – خطوط تكييف …) فممكن تيجى تركب الكشاف تلاقيه عامل كلاش مع أى حاجة من دول … طب لو لقيت حاجة زى كده هتعمل ايه .؟؟ ممكن تقترح إن ارتفاع السقف يتغير ( وغالبا دا هيترفض ) ..غالبا هيكون الحل إن الحاجة اللى فوق السقف يتغير مسارها عشان توسع للكشاف مكان أو أنك تعيد توزيع الكشافات فى أماكن ينفع تتركب. فيها ….وأيا كان التغيير لازم تعتمده من الإستشارى قبل ما تنفذه … عن طريق انك تقدم FCR .. ( field change request ) ……. هترفق. معاه الرسومات اللى بتوضح وتثبت كلامك و ترفق التغيير المطلوب

١٠- زى ما قلنا هتبص لقدام دايما …. مش بس للمراحل النهائية فى التنفيذ ….لكن هتبص لما بعد انتهاء التنفيذ ….مثلا إيه الإختبارات المطلوبة ( testing and commissioning ) …مثلا وزارة الكهرباء هتيجى تستلم غرف الكهرباء قبل إطلاق التيار فتكون عارف من البداية إيه متطلباتهم …مثلا الدفاع المدنى هيتستلم المشروع يبقى تعرف وتسأل ازاى الدفاع المدنى بيستلم وإيه متطلباته وهكذا ….طب التسليم الإبتدائى للمشروع بيتم ازاى والمفروض يكون معاده امته …كذلك التسليم النهائى ..كل ماتقدر تبص لقدام وتجمع معلومات عن طريقة تسليم المشروع هيكون مفيد ليك كتير وانت لسه فى مرحلة التأسيس

١١- لازم تكون متابع الجدول الزمنى كويس …يعنى مثلا انت عارف ان الحوائط فى منطقة معينة المفروض تبدأ تتمحر ( plaster ) .. فى تاريخ معين يبقى انت لازم تكون مخلص ومسلم شغل الكهربا بتاعك على الحوائط دى عشان ماتأخرش مقاول المدنى …. مثلا السقف فى منطقة معينة هيتقفل فى تاريخ معين فلازم تكون مخلص شغلك ومسلمه قبل التاريخ ده وهكذا

١٢- زى ماقلت لك فى رقم ١١ إنك تحاول ماتعطلش مقاول غيرك عشان ما تأخرش المشروع ….فما تنساش إنك مقاول .. وأهم حاجة إنك تدخل فلوس لشركتك …فبتكون ماشي بشغلك فى إتجاهين …إتجاه إنك ماتعطلش غيرك ..وإتجاه إنك تركز وتدوس فى البنود اللى بتجيب فلوس …زى مثلا الكابلات واللوحات …..عشان لو ركزت بس فى إنك ماتعطلش غيرك ممكن تلاقى نفسك فى أخر المدة ركبت شوية مواسير وعلب وما عملتش مستخلص يذكر
خليك فاكر إن المستخلص ده هو اللى بتقبض منه إنت و زمايلك

١٣- لو انت شغال فى مشروع كبير ممكن يكون دورك صغير جدا ممكن تكون مسؤل عن بند زى حوامل الكابلات ( التريهات والترنكات و. ..) ….لكن دا مايمنعش إنك تكون على دراية عامة بالمشروع ……مش معقول تكون مهندس كهرباء فى مشروع ومشعارف حمل المشروع كام …أو عندك كام محول فى المشروع …أو ……أو ……..
طب إيه أسهل مستند تقدر تاخد منه صورة عامة عن المشروع ؟؟
أكيد مش هتفتح كل رسومات المشروع …طب هتعمل أيه يا بطل ؟؟

هتروح جرى على جدول الكميات ( BOQ ) .. ( bill of quantities ) …..مش بس هتقدر تفهم منه صورة عامة عن المشروع دا هيساعدك فى إدارة الجزء بتاعك وهتعرف منه المعدات اللى فى المشروع زى المحولات والمولدات واللوحات و وحدات التكييف وغيره وغيره كتير
وكمان بتديك تصور للخامات اللى المشروع محتاجها
والخامات دى حاجة غاية فى الأهمية بدرجة لا تتخيلها
ليه بئا الخامات مهمة جدا ؟؟؟
هتعرف فى رقم ١٤
يلا بينا

١٤- الخامات مهمة جدا فى أى مشروع تنفيذ …. فيه خامات بتستخدم بشكل كبير جدا فى المشروع وبشكل يومي لمدة طويلة من المشروع زى المواسير وإكسسوارتها ….. تخيل معايا كده إنك معاك ( مثلا يعنى ) ٣٠ فنى ومساعد …وفيه سقف خرسانة هيتصب بعد بكرة …. والمفروض تخلص مواسير الكهربا قبل الصب ….عملت طلب صرف للخامات من المخزن بمواسير و بوكسات و couplers …لقيت أمين المخزن بيقولك إن كل حاجة موجودة ماعدا ال couplers مثلا …..شوف كده كامل عامل هيتعطل … مش كده وبس دا مقاول المدنى متفق على خرسانة جاهزة ودافع فلوسها ولازم تيجى فى معادها وكده إنت عطلته ….( الخلاصة إن ممكن خامة بسيطة جدا ممكن تعطل الدنيا وتكلفك خسارة كبيرة إنت فى غنى عنها )
طب أعمل إيه عشان اتفادى موقف زى ده ؟؟
لازم يكون فيه شيت إكسيل ( أو أى برنامج ) لمتابعة الخامات وصرفها والكمية المتبقية منها فى المخزن و الشيت ده لازم تتابعه بشكل دورى بحيث إن قبل الكمية ماتخلص تكون عملت طلب شراء واعتمدته ووردت الخامات المطلوبة ….
خليك فاكر ( ممكن شوية مسامير يوقفوا الدنيا لو مش عارف توفرهم للشغل )

١٥- زى ما فيه خامات يومية بتستخدمها بشكل كبير جدا فى المشروع …فيه خامات عددها محدود جدا …يعنى ممكن مشروع كبير جدا وتلاقى فيه مولد واحد و تشيلر واحد و ١٠ محولات و …والحاجات دى بتعمل لها حاجة إسمها… procurement log …. دا برضه ممكن يتعمل على شيت إكسيل ….وبيكون فيه الخامات اللى بتحتاج وقت فى التوريد …ومواعيد توريدها على حسب إحتياج المشروع وإتفاقك مع الموردين …. ( والموردين دول لو قدرت تستغلهم صح هتستفيد كتير … وهقولك ليه وازاى بعد شوية )

١٦- قلتلك فى رقم ١٣ إن جدول أو جداول الكميات مهمة فى تصور المشروع وأداة مهمة فى إدارة المشروع….بعد كده ممكن تبص فى الرسومات على أماكن الحاجات اللى شوفتها فى جداول الكميات ….مثلا لقيت فى جدول الكميات أن مشروعك فيه ٦ محولات و ٦ لوحات رئيسية و ٢٥ لوحة SMDB و هكذا
بتشوف أماكن الحاجات دى فين فى المشروع فى الدور الكام مثلا فى غرفة أبعادها كام و ياسلام بئا لو فتحت الداتا شيت بتاعة الحاجات دى وشفت أبعادها وقارنتها بأبعاد الغرف اللى هتكون فيها …..يعنى ايه ؟؟ …يعنى ممكن تلاقى على الرسومات فيه ٤ لوحات على حائط عرضه ٢ متر فى حين إن كل لوحة منهم عرضها ٨٠ سم مثلا …ودا معناه أن اللوحات مش هينفع تركب زى الرسم …وكل ما تكتشف المشاكل بدرى كل ماتقدر تحلها فى وقت أقل وبتكلفة أقل …. يعنى فى الحالة دى مثلا ممكن تعمل إيه؟ …. ممكن تعمل زى رقم ٥

١٧- برضه الحاجات الكبيرة اللى زى المحولات والمولدات و التشيلرز و ….. و ….. بعد مابتعرف أماكنهم …ومدى تناسق أبعادهم مع أبعاد الغرف اللى هيتركبوا فيها …لازم تفكر إزاى الحاجات دى هتدخل المشروع …فيه مشاريع بيكون فيها محولات فى الدور ال ٢٤ مثلا ..والتشيلر فى الدور التالت …وهكذا ..فلازم تكون عارف الحاجات دى هتدخل المشروع ازاى من البداية

١٨ – زى ماقلت لك إنك بتشوف الداتا شيت بتاعة الخامات اللى عندك عشان تكون عارف مواصفاتها … فالموردين هتلاقى عندهم كل المعلومات اللى ممكن تساعدك وتفهمك أكتر ……. خليك عارف إنك عميل بالنسبة للمورد اللى بتشترى منه … وإنك بتكسبه أكتر كل ماتشترى أكتر … فطبيعى إنه هيكون حريص على إرضائك عشان يورد لك خامات تانى وتالت … كمان فيه أنظمة المورد بييجى يبرمجها زى الفاير الارم مثلا ….. دورك ياغالى انك تحاول تاخد كل المعلومات اللى عاوزها عن أى نظام أو أى معدات من المورد بتاعها ….. ومهم جدا إنك تكون عارف انت عاوز تعرف إيه

١٩- زى ماشفت احنا اتكلمنا كتير عن الخامات ..ودا لإنها مهمة جدا …وإدارة الخامات أو بمعنى أدق إدارة المشتريات .. procurement management … عامل مهم من عوامل نجاح المشروع ….غير إن تكلفة الخامات بتمثل النسبة الكبرى من تكلفة البند …يعنى لو عندنا بند تكلفته مثلا ١٠٠ الف جنية ..هتلاقى الخامات بس سعرها ٦٥ ألف جنيه والباقى عمالة و تكلفة غير مباشرة و مكسب
٢٠- لازم تكون كل تعاملاتك مع أطراف المشروع رسمية ….يعنى ايه ؟ …يعنى official …برضه يعنى ايه ؟؟ …..يعنى مثلا لو إنت مقاول باطن شغال تحت مقاول عام …وطلب منك المقاول العام شفويا إنك تزود نقطتين باور فى مكان معين …. ماتروحش تعملهم …أولا تطلب منه إنه يطلب أى عمل إضافى بشكل رسمى …يعنى يبعت لك إيميل واضح بطلباته ….ساعتها هترد على الإيميل ده بطلب تعلية ..يعنى … VO .. variation order …. يعنى بالمختصر اللى يارب يكون مفيد ..هترد عليه بإن العمل الإضافى ده هيتكلف مبلغ كذا ووقت كذا ..ولو العمل الإضافى ده هيأثر على مدة المشروع ..هتقدم طلب extension time …كل ده تبعتهوله وتاخد منه موافقة رسمية عليه قبل ما تضرب مسمار فى أى أعمال إضافية ….طب هتحدد التكلفة إزاى والوقت ؟؟؟ شوف رقم ٢١

٢١- مهم جدا وإنت فى مرحلة التنفيذ إنك تكون عارف كفاءة الفريق بتاعك ..يعنى الفنى المتوسط الطبيعى بتاعه يركب كام تراى فى اليوم أو يقفل كام لوحة فى اليوم أو يركب كام علبه فى اليوم ..وهكذا ….يعنى هيكون معاك شيت إكسيل فيه اسماء الفريق بتاعك …ووظيفة كل واحد ..مساعد أو فنى أو تيم ليدر أو فورمان أو سوبر فايزور أو جنرال سوبر فايزور ….وهتحط تقييم لكل واحد فى بنود المشروع المختلفة ….دا هيكون مفيد ليك …لإنك ممكن وانت فى اجتماع تتسأل إمته هتخلص اللوحات اللى فى ال Area الفلانية ؟ طبعا انا قلتلك من شوية إنك تكون عارف ومذاكر المشروع فالمفروض هتكون عارف عدد اللوحات وأماكنها ومن خلال التقييم الدورى اللى بتعمله للفريق بتاعك تقدر تقول مدة معقولة ومتناسبة مع إمكانيات الفريق بتاعك ….كذلك لو انطلب منك أعمال إضافية تقدر تحدد عدد العمال والوقت اللى هياخدوه لإنجاز العمل الإضافى و عشان تحسب تكلفة العمل الإضافى هتشوف سعر الخامات كام وتجمع عليه تكلفة العمالة ومكسبك والتكلفة غير المباشرة وطبعا الكلام ده لو العمل الإضافى مكانش موجود حاجة من جنسه فى التعاقد الأصلى ( طبعا لو العمل الإضافى مثلا كان إضافة ١٠ مخارج إنارة وانت فى التعاقد الأصلى بتاعك حاطط نقطة الإنارة ب ١٠٠٠ ج مثلا هتلتزم بيها )

٢٢- تقييمك للفريق بتاعك ومعرفة نقاط الضعف والقوة عند عند كل واحد هيخليك تقدر تستغلهم بشكل أفضل يعنى تعمل هتعمل .. resources optimization …. مش كده وبس لازم تدرب الفريق بتاعك و تقوى نقاط الضعف ….يعنى لو فنى شاطر فى تقفيل اللوحات يعلم الفنى الضعيف فى الحتة دى وهكذا …….بحيث أن كل واحد من الفريق هيكون ليه بديل واتنين ….لو حد حب يمشي أو تعب أو … أو …… يكون عندك البديل بتاعه …كذلك لو أى مورد جاى يعمل توصيلات أو أى حاجة فى السيستم بتاعه تخلى حد من الفريق بتاعك يتعلم منه ……وإوعى تفكر إنك لما تدرب حد دا هيخسرك لإن اللى بيتدرب مش هتاخد منه إنتاج…. بالعكس دا مكسب ليك ..لإن التدريب إستثمار على المدى البعيد خصوصا لو الشغل مريح فى المشروع لأى سبب تقدر تستغل الوقت ده فى التدريب

٢٣- الأرشفة أو ال .. documentation .. مهم جدا ….يعنى الخطابات والمراسلات بينك وبين المقاول العام وكذلك أى حاجة بتقدمها للإستشارى للإعتماد …..لازم تحتفظ بيها بشكل إحترافى وبشكل يسهل لك الوصول إليها فى أى وقت تحب ترجع لها

٢٤- متابعة وتسجيل تقدم الأعمال فى الموقع مهم جدا وكذلك دراسة الأعمال المتبقية والزمن المتوقع لإنهائها …..يعنى مثلا ممكن تعمل شيت إكسيل …. وتقسمه بأى شكل مناسب لحجم المشروع …وتسجل فيه كل الأعمال المطلوبة ….وزى ماقلت لك إن كل جزء بيخلص بتسلمه للإستشارى ب WIR …. وكل WIR بيكون برقم معين ….سيادتك بئا هتسجل أرقام ال WIRs ..فى شيت الإكسيل ..بحيث تفضل شايف قدامك كل حاجة سلمتها وكل حاجة باقية ….ممكن مثلا يجيلك إيميل إن المقاول العام عاوز يقفل سقف فى area معينة …وبيسألك انت مخلص شغلك فوق السقف ولا لا …بكل بساطة تقدر تبص فى شيت الإكسيل وترد عليه إنك مخلص كل شغلك ومسلمه للإستشارى وتحط كمان أرقام ال WIRs ..اللى بتثبيت إنك سلمت

٢٥- التواصل مع الناس اللى معاك فى المشروع مهم جدا سواء الإستسارى أو مديرك أو زملاءك فى العمل أو الفريق بتاعك ….مهم جدا إنك تكون راقى فى تعاملك مع الكل …علاقتك الكويسة مع الإستشارى مثلا ممكن تحل لك مشاكل كتير ..لازم تفهم إن كل واحد ليه دور بيقوم بيه ..فرد الأمن ..العامل ..الفنى ..السكرتير ..مدير المشروع …كل واحد عبارة عن ترس فى آلة كبيرة ..لو ترس واحد اتعطل هيحصل خلل …..ماينفعش تكذب لأى سبب من الأسباب ..حتى لو أخطأت وكنت سبب فى مشكلة خليك أد المسؤلية وتحمل نتيجة خطأك …وخد بالك لو حد فى الفريق بتاعك أخطأ فمينفعش تقول أصل الفنى غلطان ..الخطأ دائما خطأ المدير .. ( خليك أد المسؤلية ) … ماينفعش تخبى معلومات أو مشاكل فى الشغل على مديرك ..برضه لو فرضنا أن مقاول تانى معاك فى المشروع كسر لك جزء من شغلك لازم يكون رد فعلك محترم وبطريقة إحترافية ( مثلا تصور الجزء المتكسر وتبعت إيميل وتطالب بتكلفة إصلاح الشغل و تدرس تأثير مدة الإصلاح على زمن المشروع الكلى وتطالب بيها ) ….برضه فى التواصل ماينفعش يكون فيه ناس أجانب فى الشغل وانت مش بتعرف تتكلم كلمتين انجليزى على بعض …برضه فى التواصل مش المفروض كل المعلومات تكون متاحة للجميع …لازم تفرق بين المعلومة اللى ينفع توصلها لفريقك واللى ماتنفعش ..ايه المعلومات اللى ينفع توصلها المقاول العام وايه اللى ماتنفعش ..التواصل مهم جدا …حتى مدير المشروع بيقضى 90% من وقته فى التواصل

٢٦- إدارة المخاطر : فيه فرق كبير بين إنك تقول لمديرك إن فيه مشكلة معينة حصلت ومحتاجين نشوف ليها حل أو إنك تقول له إن فيه مشكلة حصلت وكنت متوقعها وعندى ليها أكثر من حل وكل حل هيكلفنا فلوس أد ايه و وقت أد إيه وتأثيره إيه على المشروع ككل …..طبعا

٢٧- طبعا مافيش موقع مافيهوش مشاكل ….ولو أطراف المشروع كتيرة هتزيد عدد المشاكل ..عشان كده من الضرورى تسجيل كل مشكلة و مين المفروض يحلها و امته المفروض يكون حلها بالفعل ….ممكن تعمل شيت إكسيل اسمه …. issue log …. يتسجل فيه كل مشكلة وتاريخ حدوثها وأمته لازم تتحل ومين هيحلها وتأثير كل مشكلة على وقت وتكلفة المشروع ككل .

٢٨ – زى مافيش مشروع مافيهوش مشاكل مافيش مشروع مافيهوش أخطاء … عشان كده من الضرورى تسجيل ( أولا بأول ) كل الأخطاء اللى أى حد وقع فيها …عشان ماتتكرش فى المشاريع الجاية ..وممكن تعمل شيت اسمه lesson learned …. تسجل فيه الحاجات دى

٢٩ – لازم تطور نفسك …. لو كل يوم اتعلمت معلومة جديدة خلال السنة هتكون حصلت ٣٦٥ معلومة ولو سنة كبيسة يبقى ٣٦٦ معلومة …. كل فترة امسك ورقة بيضاء واكتب فيها سؤال وجاوب عليه …. ايه هو السؤال ده؟ ….السؤال هو انا باعرف اعمل ايه لحد النهاردة ؟ ..وبعد ماتجاوب حاول تترجم ده لفلوس عشان تعرف سعرك كام فى السوق ….حاول تتعلم من اللى أكبر من فى مجالك سواء فى شركتك او خارج شركتك … والحصول على المعلومة أصبح سهل حاليا ….و غير مكلف … النت مليان كورسات مجانية …لكن المهم انك تكون عارف انت محتاج تتعلم ايه .. الجانب الفنى مهم انك تكون كويس فيه لكن الأهم الجانب الإدارى …زى ماشفت فى النقط اللى فوق معظمها إدارية …. وإلا لو ركزت على النواحى الفنية بس هيبقى الفرق بينك وبين المشرف أو الفنى مش كبير

٣٠- طبعا كل شركة وليها نظامها وكل مشروع وليه ظروفه …. لو انت فى شركة كبيرة ومشروع كبير أكيد مش هتعمل كل الحاجات دى لوحدك ….لكن ممكن الظروف تحكم عليك تكون ماسك موقع لوحدك ..وانت المهندس الوحيد اللى فى المشروع ومطلوب منك كل حاجة لوحدك